Imprimer
Catégorie : Non classifié
Affichages : 969
s. m. Disciple de Jesus-Christ qui a eu sa mission pour prescher son Evangile par tout le monde. Le Symbole des Apostres. St. Pierre est le premier des douze Apostres. St. Paul est appellé par excellence, l'Apostre des Gentils, parce que c'est celuy qui a fait le plus de conversions.

APOSTRE, est aussi celuy qui a le premier planté la Foy en quelque endroit. St. Denis de Corinthe est l'Apostre de la France. St. François Xavier est l'Apostre des Indes.

Le peuple appelle aussi Apostres, des Confreres ou Penitents qui vont nuds pieds aux Processions du St. Sacrement & en d'autres solemnités. St. Augustin fait mention de certains Heretiques qui furent appellés Apostres, qui faisoient profession de ne rien posseder en ce monde.

On dit proverbialement & ironiquement, qu'un homme est un bon Apostre, pour dire, que c'est un bon compagnon, ou qu'il est hypocrite.

On appelloit autrefois Apostres, les Lettres dimissoires données à un appellant par les Juges à quo, adressantes au Juge d'appel, par lesquelles il le certifioit de l'appel interjetté, il luy en laissoit la connoissance, sans lesquelles il n'étoit pas permis de le poursuivre par l'ancienne rigueur de droit ; ce que l'article 117. de l'Ordonnance de 1539. a aboli. Le delay d'obtenir ces Lettres étoit de trente jours ; au lieu de quoy on a introduit les desertions.

Ce mot vient du Grec apostolos, qui signifie, un homme envoyé.