Pronom personnel, qui particularise la chose, & la rend separée & differente de toutes les autres. Bonnet blanc, & blanc Bonnet, c'est la mesme chose. Phaebus & Apollon, c'est la mesme personne sous des noms differents. Sparte & Lacaedemone, c'est la mesme ville.

MESME, signifie aussi, Semblable. Je veux avoir du mesme drap, pour dire, de la mesme nature, couleur & fabrique. J'y vois les mesmes traits de visage, je ne sçai si c'est le mesme homme.

En termes de Blason, on dit de mesme, pour éviter la repetition du nom de l'Esmail, qu'on a desjà nommé une fois. Il portoit d'or à trois fasces de sable surmontées de trois merlettes de mesme, c'est à dire, encore de sable.

MESME, s'adjouste quelquefois pour augmenter la force de l'expression. Le Roy est venu luy-mesme en personnne faire verifier cet Edit. Cet homme est la bonté mesme, cette femme est la mesme vertu. C'est la beauté mesme. Dieu est le seul qui subsiste par soy- mesme.

MESME, adv. qui sert de transition, & signifie, En-outre. On doit tout sacrifier, & sa vie mesme, pour son salut. On m'a dit que cela estoit, on me l'a mesme voulu faire voir par experience. Mesme j'adjouste à ce que j'ay dit, &c.

MESME, est quelquefois opposé à non seulement, tant s'enfaut, & autres termes semblables. En ce temps-cy on est non-seulement brave, mais mesme temeraire. Tant s'enfaut qu'on doive estimer le vice, que mesme il le faut abhorrer.

On y adjouste quelquefois la particule de pour servir de comparaison. De mesme que le Soleil brille sur la terre, ainsi le juste brillera dans le Ciel. Il faut avoir l'habit & le manteau de mesme, pour dire, semblables. Comme vous aurez fait aux autres, on vous fera de mesme. On dit aussi, Prenez en, vous estes à mesme, pour dire, à vôtre discretion, tant que vous voudrez.