VIOLET, ETTE. adj. & subst. Couleur meslée de bleu & de rouge, qui ressemble à la fleur qui porte ce nom. Le violet est la couleur de l'Eglise que portent les Ecclesiastiques, & sur tout les Evesques. La teinture la plus estimée des Anciens étoit la pourpre violette. Il y a des pesches & des prunes violettes, qui approchent de cette couleur, & qui sont excellentes. On dit aussi, qu'un corps est tout violet, lors qu'il est meurtry, qu'il est gelé de froid, qu'il est couvert de pourpre, parce qu'il tient un peu de cette couleur.

On dit proverbialement, quand on a receu quelque coup dans les yeux, ou dans la teste, qui a causé quelque éblouïssement, qu'on a veu des Anges violets. On appelle contes violets, des contes qui n'ont point de vraysemblance, des choses qu'on n'a veuës que dans ces éblouïssements. On dit faire du feu violet, pour dire, faire quelque chose qui paroisse, & qui éclatte plus qu'à l'ordinaire ; par allusion au feu que fait le bois verd, qui est violet, & qui est plus ardent que les autres.