s. f. Gomme, suc gras & visqueux qui coule des pins ou sapins, & de quelques autres arbres, qui s'enflamme aisément, & dont on fait de la poix & autres drogues. On mesle la poix resine dans les flambeaux. Le mastic est la resine du lentisque. Le camphre est une espece de resine. La meilleure de toutes les resines est la terebenthine, qui doit estre blanche & claire, tirant un peu sur le pers ; & aprés celle du lentisque, du pin, du sapin ; & enfin celle de la pesse. Le cyprés produit aussi une resine liquide qui a les mêmes proprietez que les autres. Pline distingue seulement deux sortes de resine, la liquide, & la seche. La resine seche se tire des pommes de pin, de sapin, & de la pesse. On l'appelle proprement poix resine. La meilleure est celle qui est odorante & transparente, qui n'est ni seche, ni humide, & qui ressemble à la cire. On fait cuire, secher & brusler les resines pour en tirer de la suye, comme on fait de l'encens, ou pour en faire de la colophone, qu'on appelle resine fritte.