s. m. C'est un terme particulierement affecté aux monnoyes. Il signifie, Toute matiere d'or, ou d'argent qui est alliée, c'est à dire, meslée au dessous d'un certain degré, & principalement de celuy qui est fixé pour la fabrication des monnoyes : comme maintenant que la fabrication des louïs d'or est fixée à 22. carats, & des louïs d'argent à 11. deniers, le billon d'or est celuy qui est à 21. carats ; & le billon d'argent, celuy qui est au dessous de dix deniers. Il y a deux sortes de billon d'argent, l'un nommé haut billon, qui est à dix deniers, & au dessous jusqu'à cinq ; & l'autre bas billon, qui est au dessous de cinq deniers. Il est deffendu à tous Merciers Billonneurs, & autres personnes qui ne sont point Orfevres, de vendre, ni acheter aucun or, ni argent, si ce n'est pour billon.

BILLON, signifie aussi, Toute sorte de monnoye qui est décriée à quelque titre, & de quelque alloy qu'elle puisse être : & en ce sens on dit, qu'il faut envoyer la monnoye au billon, c'est à dire, qu'elle sera fonduë & remise sous les coins.

BILLON, se dit aussi de la menuë monnoye de cuivre, comme sont liards, doubles, &c.

BILLON, signifie aussi, le lieu où l'on porte la monnoye décriée, legere ou defectueuse, pour la refondre, & en recevoir la juste valeur, comme sont les Bureaux du Change, ou de la Monnoye.

BILLON, est aussi du bas argent qu'on affine avec la casse d'Orfevre comme l'autre argent, mais sans eau forte. Menage derive ce mot de binio, qui signifie un denier. Covarruvias de vellus, à cause que les Romains marquoient leurs monnoyes de cuivre de la figure d'une brebis. Nebrissensis le derive de vilis. Borel le derive de villon, ou de guillon, qui signifioit autrefois tromperie ; d'où vient qu'on donna ce nom à un vieux Poëte nommé François Corbeuil, à cause de ses friponneries. Mais Bouterouë le derive du Latin bulla, qui a signifié autrefois des sceaux, & des matrices qui servoient à former les coins des monnoyes ; & c'est ainsi que les appelle Harmenopule. Du Cange croit qu'on l'a ainsi nommé, à cause que c'est aurum aut argentum in massam seu billam, 4. baculum, conflatum, necdum purgatum.