s. m. Rente seigneuriale & fonciere, dont un heritage est chargé envers le Seigneur de Fief d'où il depend. Le cens est imprescriptible, & non rachetable. Le cens emporte droits de laods & ventes, de saisine & amende en cas de vente. Il y a un cens mort ou cens truhan, qui ne porte aucuns droits, dont il est parlé en la Coustume de Soesmes & d'Auvergne.

CHEF-CENS, est le premier cens ; Surcens, celuy qui y a esté adjousté. Le menu cens ne consiste d'ordinaire qu'en tournois, mailles & autres petites monnoyes, & est le chef-cens & capital, & plus seigneurial que le gros cens, qui est une espece de rente dont l'heritage est chargé. Le premier n'est qu'un signe & reconnoissance de la Seigneurie de celuy qui le premier a donné l'heritage à cens. Il y a aussi un cens à queste, qu'en la Coustume de Melun on appelle Rogo, que le Seigneur est tenu de demander ; & on l'appelle autrement cens requerable : au lieu qu'on est obligé de porter les autres cens en la maison du Seigneur. Ce mot vient de census. Nicod.

On dit proverbialement, Quitter la terre pour le cens, pour dire, Se deffaire d'une chose qu'on possede à des conditions trop onereuses.

On dit, des Seigneurs & des heritages censables, censifs, censiers & censuels, selon les divers pays & Coustumes, en parlant d'un Seigneur qui a droit de lever un cens, ou d'un heritage qui en est chargé envers luy.