BANQUEROUTIER, IERE. subst. masc. & fem. Marchand, ou Banquier qui fait banqueroute. On n'est pas assez severe pour condamner les banqueroutiers frauduleux ; on ne les met qu'au Pilori, & souvent ils meritent la corde. On les condamne en quelques lieux à porter le bonnet verd ; & à Luques, à porter un bonnet orangé : quoy que l'Ordonnance de Henry IV. de l'an 1609. & celle de l'an 1673. ordonnent qu'ils soient poursuivis extraordinairement, & punis de mort ; ce qui a eu peu souvent son execution. On appelle proprement banqueroutiers frauduleux, ceux qui divertissent leurs effets, ou qui les mettent à couvert sous des noms interposés, par de fausses ventes, ou des transports simulés, ou qui font paroistre de faux creanciers.