s. f. est un gros fruit à noyau qui vient sur la fin de l'esté, des plus delicieux qui se mangent. La premiere & la plus hastive est l'avantpesche musquée, qui est blanche & petite, douce & sucrée. La pesche de Troye est une avantpesche musquée rouge qui est plus grosse ; & une autre qu'on nomme la double de Troye, est plus ronde. L'alberge est jaune dedans & dehors, de mediocre grosseur, d'excellent goust, un peu platte. Son noyau est d'un rouge violet. Il y a une alberge rouge, & une autre violette. La pesche magdelaine est grosse & ronde, & prend un peu de rouge. C'est la plus estimée des pesches. Il y en a une musquée qui a plus de goust que les autres. La pesche magdelaine rouge, ou pesche païsanne, vient moins grosse que la blanche, & sa chair est delicieuse. La pesche mignonne, ou la veloutée, est une espece de magdelaine hastive plus platte que ronde, fort colorée en dehors & en dedans. Le pavis blanc & le masle de la magdelaine est d'un goust fort relevé & musqué. Il y a aussi un pavi rouge & jaune, & il n'y a point de pesche qui n'ait son pavi. La pesche cerise est petite, lice, ronde, a la chair dure, seche, & de peu de goust. La pesche loyale est belle & rouge, plus longue que ronde. La belle chevreuse est d'un rouge fort vermeil, & d'une eau fort douce, qui est longuette & assez grosse. La pesche d'Italie est une de ses especes, & tire sur la pesche de Pau. La pesche dreusel est plus longue que ronde, fort veluë & colorée. On la nomme sanguinole, à cause que sa chair est toute rouge. La pesche bourdin est toute ronde, tres-charnuë, assez rouge, d'une mediocre grosseur, d'un goust tres-relevé, & passe pour une des meilleures pesches. La pesche violette est plus longue que ronde, vineuse, & tres-fondante. Il y en a de la grosse, & de la petite espece. Il y en a aussi une tardive ou panachée qui vient en automne. La pesche lissée blanche est plus rare, & n'a pas le goust si relevé que la violette. Il y en a une autre lissée, jaune, assez grosse, & platte & tardive. Toutes ces pesches lices ont leurs masles qu'on nomme brugnons, qui sont plus ronds, plus gros, & d'un goust excellent & relevé, qui les fait nommer musqués. Ils ont la chair ferme & dure, & ne quittent point le noyau. Le teton de Venus est une pesche qui ressemble assez à l'admirable, qui est ronde, & faite en teton, qui a une pointe comme une tete, qui est blanche en dedans, & un peu rouge en dehors, qui a une chair delicate & fondante, & une des meilleures des pesches tardives. La pesche commune appellée pesche de Corbeil, est ronde, blonde, veluë, assez bonne, comme une madelaine bastarde, mais elle est amere dans les terres fortes. Il y a une pesche à fleur double plus recherchée pour sa fleur que pour son fruit. La pesche dite admirable, à cause de sa grosseur, beauté & bonté, est presque ronde, & rouge, tres-fondante, & comme une madelaine tardive. La pesche pourprée, ou la nivette, est une grosse pesche presque ronde, d'un rouge brun velouté, fort charnuë, & de tres-bon goust. La pesche dandilly est tres-grosse, ronde, charnuë, blanche dehors & dedans, qui est comme une persique blanche. La persique est une tres-grosse pesche, moins longue, & plus ronde que la pesche de Pau. Elle est rouge & pointuë, & a d'ordinaire des bosses. Sa chair est delicate, pleine d'eau, & tres-rouge vers le noyau, qui est plat & pointu. La pesche d'abricot, ou scandalie, est de deux sortes, toutes deux rondes ; l'une veluë, & un peu rouge ; l'autre plus lice, & jaune, dont la chair a le goust d'abricot. La pesche bellegarde est belle, grosse, ronde, fort peu rouge dedans & dehors, & tres-bonne, & assez tardive. La pesche Narbonne est grosse & verdastre, a la chair seche & cotonneuse, qu'on estime parce qu'on la mange en la saison tardive. La pesche rossane de Languedoc est jaune dehors & dedans, longue, grosse & tardive. La belle de Vitri est une tres grosse pesche camuse, charnuë & pleine de bosses, fort rouge vers le noyau qu'elle a petit, est tardive & excellente. La pesche de Pau est de deux sortes ; la ronde qui est la meilleure ; & la longue, qui est platte, & sujette à pourrir au dedans, son noyau se fendant pour l'ordinaire. Son masle est tres-gros, & nommé pavi monstrueux, beau, rouge, & tres-charneux. Il y a aussi plusieurs autres especes de pesches, comme pesches blanches, jaunes, & rouges, mericotons, & pesches beteraves, qui ont de la peine à meurir en ces pays-ici.
