v. act. & n. Faire une prophetie. Les Patriarches & les Prophetes anciens ont prophetisé le Messie.

L'Escriture prend quelquefois ce mot en mauvaise part, & signifie, Fureur. Quand le malin esprit se saississoit de Saül, il prophetisoit, & David appaisoit sa fureur avec sa harpe, comme on voit au I. des Rois, Cap. 18. & 19.

PROPHETISER, signifie quelquefois, Prescher ou faire quelque chose au nom de Dieu. Beaucoup diront au jour du Jugement, Seigneur, n'avons-nous pas prophetisé en ton nom, chassé des Demons, & fait plusieurs choses merveilleuses ? en St. Matthieu, Ch. 7. v. 22. St. Paul ayant baptisé plusieurs Disciples à Corinthe, ils parloient plusieurs langues & prophetisoient, aux Actes, Ch. 19. v. 6. St. Paul dit que l'homme doit prier & prophetiser nuë teste, & la femme prier & prophetiser la teste voilée, I. aux Corinth. Ch. 11. v. 4. & 5.

PROPHETISER, signifie aussi, Deviner. Les Juifs ayant bandé les yeux de JESUS-CHRIST, & luy frappant le visage luy disoient, Prophetise nous qui t'a frappé, pour dire, devine.