s. m. C'est la production & la sortie d'un foetus parfait & entierement accompli hors du ventre de la mere, soit qu'il sorte mort, ou vif. L'enfantement naturel, selon les Medecins, doit avoir trois conditions : la premiere, que l'enfant & la mere s'efforcent autant l'un que l'autre à sortir, ou à le faire sortir : la seconde, qu'il vienne au monde la teste la premiere, qui est la posture naturelle : la troisiéme, qu'il soit prompt & aisé, & sans accidents. Car quand un enfant se presente les pieds devant, ou en travers, ou en double, ce n'est plus un enfantement naturel, & les Latins appellent ces enfants, agrippae, comme qui diroit aegrè parti. On appelle enfantement legitime, celuy qui vient justement à son terme ; & illegitime, celuy qui vient ou plustost, ou plus tard, comme celuy de huit mois. L'enfantement des femmes se fait à 7. à 8. à 9. à 10. & à 11. mois, & non plus tard.