subst. fem. On le dit en la plus-part des significations precedentes. La maistresse de la maison. La maistresse de l'hostellerie, du cabaret, des trois Rois, de la Croix d'or, &c.

On dit aussi, une maistresse femme, pour dire, une femme habile, qui sçait gouverner sa famille, les affaires de la maison.

On le dit particulierement d'une fille qu'on recherche en mariage. Il a fait de beaux presents de nopce à sa maistresse, à son accordée.

On le dit aussi d'une personne de mauvaise vie qu'on entretient, & generalement de toute personne à qui on fait l'amour.

MAISTRE, en termes de Blason, se dit de la plus grande partie d'un Escu, quand le bas n'est garni sinon d'une pointe, qui est le même que le chappé. Il porte d'argent au maistre ployé ou arrondi de gueules.

MAISTRE, se dit proverbialement en ces phrases.

Pour bien servir & loyal estre

De serviteur on devient maistre.

On dit que les bons Maistres font les bons valets. On dit aussi, Tel Maistre, tel valet, pour dire, que les valets suivent l'exemple des Maistres, & particulierement en mal. On dit aussi, Qui a compagnon, a maistre, pour dire, que dans une Societé on ne sçauroit disposer de rien de son chef. On dit aussi, qu'il faut estre compagnon de sa femme, & maistre de son cheval, pour dire, qu'il faut traitter doucement l'une, & gourmander l'autre. On dit aussi, que le Charbonnier est maistre en sa maison, pour dire, que le moindre particulier est maistre quand il est chez soy. On dit aussi, qu'on a passe maistre quelqu'un, quand on ne l'a point attendu pour disner. On dit aussi, qu'un homme a trouvé son maistre, quand il a trouvé quelqu'un plus fort, plus sçavant que luy, soit dans le combat, soit dans la dispute. On dit aussi, Pain couppé n'a point de maistre. On dit aussi, C'est un maistre Sire, un maistre homme, pour dire, C'est un homme d'importance, qui sçait bien se faire valoir. On dit aussi, C'est la Cour du Roy Peto, où tout le monde est maistre. Ce proverbe se dit de l'assemblée des gueux qui sont tous égaux. On l'appelle la Cour du Roy Peto, parce que tous vivent de mendicité, & que le mot Latin peto signifie mendier.